24 Март за „Здружување против туберкулозата“
Денес, 24 март, е Светски ден за покренување на свеста за туберкулозата. Светската Здравствена Организација (WHO), ги повикува властите, заедниците, граѓанскиот и приватниот сектор за „Здружување против туберкулозата“. Напорите вклучуваат вкрстување на дисциплини и сектори за напредување на одржливиот развој во повеќе области, вклучувајќи елиминација на сиромаштијата, универзална здравствена покриеност, мајчинска и детска грижа и социјална заштита и правда.
Во Македонија, деновиве, во пресрет на 24 март, беше одржана прес-конференција, организирана од Националниот координативен механизам во соработка со Институтот за белодробни заболувања и туберкулоза и Министерството за здравство. Директорката на Институтот белодробни заболувања и туберкулоза и национален координатор за туберкулоза, Билјана Илиевска Поповска, истакна дека е намален бројот на детски случаи со туберкулоза. Во 2015 година биле регистрирани 14 заболени деца од туберкулоза, што е за пет помалку споредено со 2014 година.
Македонија веќе четири години наназад се вбројува во земјите со ниска стапка на регистрирани случаи со туберкулоза.
Во 2015 година се откриени 284 случаи, што е за еден случај помалку споредено со 2014 година. Стапката на смртност е иста како и во 2014 година и изнесува 18 починати лица.
Туберкулоза е заразна болест предизвикана од Mycobacterium tuberculosis кој ја открил Роберт Кох (1882) и во негова чест уште се нарекува Кохов бацил. Се пренесува преку воздухот и најчесто се заразуваат белите дробови, но можат да бидат опфатени и други органи. Сè додека одбранбените способности на заразениот организам се добри, заразата ќе биде под контрола, односно нема да се појави болеста. Туберколозата е една од најчестите и најраните манифестации кај лицата заразени со ХИВ.
Во периодот помеѓу 2000 и 2014 година, 43 милиони животи се спасени со тоа што им е одредена дијагноза и третман, што значи дека моменталната стапка на намалување на болеста изнесува 1,5% годишно.
