Контаминација со опасниот токсин церeулид е причината за повлекување од пазарите низ Европа на Аptamil (Danone) и NAN (Nestle)
По глобалното повлекување на формула за бебиња од страна на некои од најголемите светски компании, француските власти ги истражуваат смртните случаи на две бебиња за кои е пријавено дека консумирале формула за доенчиња од Nestlé, засегната од повлекувањата поради контаминација со церeулид.Француското Министерство за здравство за Euronews Health потврди дека досега научно не е утврдена причинско-последична врска. Глобалните млечни гиганти и производители на адаптирани млечни формули за доенчиња, продолжуваат со повлекување на формулите за бебиња поради скандалот со контаминација со церeулид, додека Франција истражува две смртни случаи на доенчиња.
Од компанијата Nestlé соопштија дека внимателно ги следат случувањата и соработуваат целосно и транспарентно, обезбедувајќи ги сите побарани информации.
Фламанската влада во Белгија пак, потврди дека бебе се разболело во јануари 2026 година откако консумирало контаминирана формула за бебиња од Nestlé.
„Детето имаше повраќање и течни столици (дијареја), но за среќа целосно закрепна по околу 10 дена. Преку анализа на столицата на бебето, потврдивме дека заболувањето било предизвикано од контаминација со церeулид од млечен производ на Nestlé“, изјави Јорис Муненс, портпарол на Одделот за грижа. Тој потврди дека серискиот број на млечниот производ што го предизвикал заболувањето кај бебето во Фландрија е дел од повлекувањето на формулата на ниво на цела Белгија.
Што е церeулид и какви се неговите ефекти кај бебињата?
Церeулид е термостабилен токсин произведен од бактеријата Bacillus cereus, која може да се размножува во храната. Најчестите симптоми на можна интоксикација со церeулид се повраќање и дијареја кратко по консумирањето на млекото,обично меѓу 30 минути и три часа, со симптоми многу слични на стомачен вирус.
Кога започнала контаминацијата?
Контаминацијата започнала на почетокот на декември минатата година. На 10 декември, Nestlé Франција најави повлекување на формула за доенчиња произведена во фабриката во Нунспет, Холандија, поради сомнеж за контаминација со церeулид.
Контаминацијата е поврзана со еден снабдувач од Кина на ARA масло (арахидонска киселина), клучна состојка во премиум формулите за доенчиња.
Од крајот на декември 2025 година, сите производители на формула за доенчиња во светот кои користат ARA масло од овој снабдувач мора да спроведат сопствена анализа на ризик за да ја осигураат безбедноста на финалните производи, соопшти Француското министерство за земјоделство за Euronews Health.
На почетокот на јануари 2026 година, Nestlé го прошири повлекувањето на дополнителни серии формула за доенчиња во 60 земји, што прерасна во едно од најголемите повлекувања во историјата на компанијата, опфаќајќи повеќе брендови како SMA, Beba, Guigoz и Alfamino.
Скандалот со токсинот се проширува – повлекување и на млечната формула Aptamil
Глобалниот скандал со контаминирана формула за доенчиња продолжува да ескалира, откако Danone потврди дека е откриен токсинoт церeулид во серија на Aptamil почетна формула, што ја засилува загриженоста за безбедноста на синџирите на снабдување во формулите за доенчиња и ја повлече серија на во млека во кои е најден токсинот од Обединетото Кралство.
Повлекувањето следи по регулаторна интервенција во Сингапур, каде што надлежните органи ја запреа продажбата на формула за доенчиња Aptamil произведена од Danone поради потенцијални бактериски ризици.
Ирските власти пак, потврдија дека засегнатата формула е произведена во Ирска и дистрибуирана во делови од Европската Унија, Обединетото Кралство и на одредени пазари надвор од ЕУ. Агенцијата за безбедност на храната на Ирска соопшти дека повлекувањето е поврзано со контаминација на специфична состојка што се користи во производството на формули за доенчиња и продолжени формули. Според нив, ARA маслото (арахидонска киселина), произведено во Кина, било контаминирано со церeулид и потоа додадено во основниот прашок што се користи за производство на формулите.
Во тек се повлекување на Aptamil млечната формула од пазарите во Германија, Австрија и Хрватска.
Danone изјави дека нивните внатрешни контроли за квалитет не откриле безбедносни пропусти и дека рутинските тестирања покажале целосна усогласеност со важечките безбедносни регулативи. Компанијата додаде дека повлекувањето се спроведува како мерка на претпазливост.
Во нашата земја, до сега е повлечена само една серија од млечната формула Aptamil. Во соопштeнието на АХВ се вели:
“Нашите испекциски служби вчера спроведоа вонредна инспекциска контрола кај оператор со храна – увозник на почетна формула за доенчиња, последователна формула за доенчиња и диететска храна за посебни медицински намени, за кои вчера како контакт-точка на Системот за брзо предупредување за храна и храна за животни на ЕУ добивме известување за пласиран небезбеден производ на македонскиот пазар. Станува збор за APTAMIL AR 2, ENG 24×400 g, серија 2027.01.02, во вкупна количина од 912 парчиња по потекло од Ирска, кај кој е утврдено присуство на цереулид (cereulide), а како извор на контаминацијата во нотификацијата наведено е маслото ARA.
Со контролата утврдено е дека целокупната увезена количина е дистрибуирана на пазарот во Македонија, односно производот не е пронајден во магацините на увозникот и дека, како што и самиот оператор ги известил и Агенцијата и јавноста, веќе се врши итно повлекување на дистрибуираните количини од овој производ од пазарот”
Извори:
