Хороскоп за 11та недела: Дознајте какво ќе биде вашето здравје наредната недела за да знаете што точно да игнорирате и да продолжите со старите навики надевајќи се на најдоброто
Овен
Ќе се чувствувате многу лесно и полетно, но за жал само психички, бидејќи телото сè уште ви е во зимски сон. Во обид да го промените ова, ќе направите десет стомачни вежби и веднаш ќе застанете пред огледало да ги видите резултатите.
Бик
Доколку добивавте паричка за секој ваш обид за поздрава исхрана, сега ќе бевте без денар. Неделава ќе бидете под стрес, бидејќи се ближи пролет и вие ќе почувствувате притисок од околината дека треба нешто да преземете во врска со вашата кондиција. Сепак, ќе одлучите да се потпрете на шармот.
Близнаци
Вие не жалите пари ако се потрошени на искуства, така што нема да ве мачат стресови, бидејќи оваа недела, најмногу ќе се истанчи вашата сметка во банка. Но добро, треба да се започне од негде со пролетното слабеење, па дури и ако се тоа непосакувани места.
Рак
Проверете си го крвниот притисок да не ви е висок, бидејќи периодов ќе имате желба за авантура и патувања. Којзнае, можеби и вие некогаш ќе бидете забавни и интересни како Близнаците.
Лав
Исмевањето на обидите на Девицата која се труди да води здрав живот, нема да ви ги зацврсти стомачните мускули. Оваа недела толку многу ќе ве изнервираат фотографиите од интернет со мотивациски пораки, што ќе одите на трчање само да не ги читате.
Девица
Од сите мускули на телото, најсилни ви се мускулите околу очите, бидејќи нив најмногу ги вежбате. Во просек превртувате со очи над сто пати во текот на еден ден.
Вага
Ќе се трудите да одржите рамнотежа со парче торта во едната рака и чипс во другата, и нема да ви биде јасно зошто вашата диета не функционира. Поимот балансирана исхрана сте го сфатиле премногу буквално.
Шкорпија
Колку повеќе јадете органска храна, толку повеќе размислувате дека пантолони со ластик и не се толку лоша работа. Се водите од начелото: „Ти си она што јадеш“ и бидејќи навистина не сакате да изгледате како марула, неделава ќе бидете по потрага на нешто вкусно и убаво.
Стрелец
Вложувањето непотребна енергија само ќе ве истроши на крајот од работната седмица. Ќе се изморите од динамиката на тапкање во место, но помислете дека и статичниот велосипед е некогаш корисен иако не води никаде.
Јарец
Подочниците ви се заштитен знак бидејќи за вас спиењето е опција. Вашата амбициозност и оваа недела ќе ви ги потроши батериите без можност за нови. Обидете се да излезете на чист воздух, да, надвор од вашите мисли.
Водолија
Ќе го игнорирате времето и ниту еднаш нема да понесете со себе чадор. Ќе бидете анксиозни бидејќи ќе пиете многу кафе, но вие ја прифаќате анксиозноста како дел од животот. Симптоми на мигрена нема да добивате од времето, туку од досадните луѓе.
Риби
Неделава често ќе ја практикувате вашата омилена физичка активност, спиење. Ова однесување ќе му го препишете на променливото време кое наводно ве уморува. Вашата најистакната вештина со која се гордеете, е способноста да заспиете на секоја површина. Исто како нинџа. Продолжете да вежбате.
