nedela-vo-koja-zhivotot-ne-vi-dava-nitu-limoni
Споделете со пријателите!

Хороскоп за 5та недела: Прочитајте како хороскопските знаци се снаоѓаат во своето секојдневие. Длабоко навлезени во комфор зоната, Овенот ќе се замислува дека постојано нешто прави, Шкорпијата ќе продолжи со плановите за светска доминација, а Лавот ќе биде убеден дека е поголем од животот и подобар од сите.

Овен

Се сметате себеси за човек од акција и затоа купувате сè што е на акција, три чоколада по цена на едно, кафе со подарок лажичка и слично. Практичноста никогаш не ви била силна страна, но се трудите. Попусто, само губите време. Но вие сте мајстор за губење време така што сепак сте во свој елемент.

 

Бик

Ви кажаа дека ви недостига витамин Б. Па како да не ви недостига, кога ги има толку многу? Б1, Б2, Б3, Б5, Б6, Б12  и сигурно уште некој број. Никогаш не сте сакале да броите, а особено не калории и чашки. Вашата тврдоглавост сепак ќе ве заштити од совети и вие ќе си продолжите по старо, внесувајќи неброени количини на храна.

 

Близнаци

Оваа недела ќе ве боли грлото. Нема да биде настинка, туку производ на вашето дерење со цел да привлечете внимание. Не ви е јасно како може никој да не се интересира за вашиот гламурозен начин на живот. Сите нив ќе ги означите како „проста маса“.

 

Рак

Неделава ќе се потрудите да се контролирате. Ќе менувате расположение најмногу два пати дневно а оние што ќе ви скокаат на живци ќе ги нарекувате танцувачи на жица. Ништо нема да може да ве извади од баланс, барем сè додека не се скине некоја од жиците. 

 

Лав

Настинките и епидемијата на грип ништо не ви можат. Зошто? Бидејќи вие така сте одлучиле. Во животот заземате став како да сте Чак Норис. Вие сте господар на својата волја и имате целосна контрола врз себеси. Освен кога ве мачат стомачни тегоби и гасови.

 

Девица

Одлучивте секој ден да јадете ароноја бидејќи се информиравте дека е многу здрава. Тоа нема да го спречи самоуверениот Лав да ви се потсмева на вашиот здрав начин на живот и аронијата ќе ја нарекува иронија.

 

Вага

Зафатени со балансирање, заборавате да се грижите за себе. Имате чувствителен стомак, но тоа не ве спречува да живеете боемски. Тоа значи јадење брза храна и замрзнати оброци доцна во ноќта. Вашата естетска природа ве советува дека помалку е повеќе, но запомнете дека тоа не се однесува на животот.

 

Шкорпија

Прокрастинација е комплициран збор што ќе го користите како штит против сите што ќе сакаат да ви трошат време, бидејќи никој не може да го потроши времето толку залудно колку што можете самите, смислувајќи големи завери. Сепак планот за доминирање со светот ќе мора да го оставите за друг пат, бидејќи вашата опсесивна природа ви ја црпи цела енергија.

 

Стрелец

Вашиот мозок е почист од другите бидејќи од толку менување на мислења редовно се проветрува. Ве сакаат деца и животни, ама со луѓето околу вас ви оди малку потешко, така што неделава ќе се дружите најмногу сами со себе. Што е добрата работа кога разговарате сам со себе? Сигурни сте дека барем еден ве слуша.

 

Јарец

Редовното читање на мотивациски пораки нема да ве направи посреќни. Дисциплината е посакува особина, но непривлечна за боемите со кои сакате да другарувате. Најдете си посоодветно друштво. Сами најубаво. Како и секогаш.

 

Водолија

Можеби сите ве сметаат за чудаци, но вие едноставно живеете во склад со природата. Сè што е човечко не ви е туѓо, барем сè додека е од естетска природа. Од невкус и неоригиналност добивате осипи.

 

Риби

Не можете да видите во која насока се движите? Не гледате излез и не ви е јасно како може вие, кои имате најмалку реални проблеми да се жалите најмногу. Никому не му е јасно и сите околу вас сакаат да престанете. Ви советуваме да слезете од облаците и да го помирисате смогот.

Прочитајте:  Идеален подарок за секој хороскопски знак

Споделете со пријателите!