Вкусни пити со јаболка како мали лапни-голтни задоволства
Питите со овошје се едни од омилените десерти на многумина. Тестото многу брзо и лесно се прави, филот се прилагодува според овошјето кое е во моментот зрело и го има најмногу по пазарите. Може да се употреби и замрзнато овошје. Формата е прилагодлива; може да биде висока пита, преполна со јаболка или капини, прекриена со слој тесто, плитка пита со крцкав крамбл врз овошјето или тарт или галета со јагоди, праски или смокви во еден слој. Се прават во тавче за мини мафини и се прекрасни мали лапни-голни десерти.
Тесто:
- 1 шолја брашно (1 лажица пченкарно, а останатото бело и интегрално грахам брашно);
- ½ лажица шеќер;
- 60 г путер, ладен, исечен на коцки;
- 2 лажици павлака;
- 2 лажици ладна вода (или колку е потребно).
Измешајте ги брашното и шеќерот, па додајте ги коцките путер и мешајте со прсти или со блендер за тесто додека не се направат зрнца. Додавајте ја павлаката и една по една лажица ладна вода и мешајте го тестото сé додека не успеете да ги споите зрнцата во топка тесто. Тестото може да се направи и неколку дена однапред и да стои во фрижидер додека не ви притреба, или да се замрзне на подолго време. Засега оставете го во фрижидер, завиткано во ќеса или поклопено во вангла, додека ги подготвувате филот и крамблот.
- ½ шолја кафеав шеќер;
- 1 лажиче ванилин шеќер;
- ½ шолја брашно;
- ½ шолја овесни снегулки (или сецкани ореви, или мешавина од двете);
- ¼ шолја путер (стопен).
Прелијте го стопениот путер врз другите состојки и промешајте. Нека отстои во замрзнувач. Може и да се замрзне на подолго време, и потоа се употребува без одмрзнување.
- 2 јаболка, излупени и исецкани на ситни коцки (2 полни шолји);
- 1 – 2 лажици сок од лимон;
- ½ шолја шеќер;
- 1 лажиче цимет;
- малку мелени каранфилче и пимент;
- 1 лажиче нишесте.
Исецкајте ги јаболката ситно, бидејќи се за мини пити. Прелијте ги со лимонов сок, ама и не мора. Помешајте ги со шеќерот, зачините и малку нишесте. Развлечете го тестото со сукало, врз малку побрашнета површина, исечете го на кругови малку поголеми од чашките на тавчето за мини мафини. Премачкајте ги чашките од тавчето со путер и притиснете ги тестата на дното и страните. Добро е тестата да бидат малку повисоки од чашките, за да можат лесно да се извадат.
Распределете го филот во тестата, убаво наполнете ги и со прсти изронете го крамблот врз филот.
Печете ги мини питите во рерна загреана на 175°C. во мојата рерна се печат околу 15 минути. Готови се кога крамблот е убаво заруменет, а филот како да врие. Оставете ги малку да се оладат, па извадете ги внимателно од тавчето. Прво пробајте да ги завртите малку лево-десно, за да се одлепи тестото од тавчето, па извадете ги.
* рецептите со во целост преземени од ситно сецкано
