После години поминати во анализи „Гугл“ го откри клучот на добрата тимска работа
Компанијата „Гугл“ создаде проект кој неколку години истражуваше што го прави еден тим успешен и продуктивен. Проектот наречен „Аристотел“, е составен од интервјуа со стотици вработени, како и анализи врз основа на податоци од над 100 активни тимови во компанијата. Ја барале магичната формула која ќе им открие од што е составен еден успешен тим.
Се докажало она што веќе добро се знае, а тоа е дека најдобрите тимови се почитуваат и се грижат едни за други. Добриот тим не го прават најдобрите вработени, туку начинот на кој комуницираат меѓусебе.
Членовите на продуктивните тимови се трудат да се разберат меѓусебно, бараат начин да се поврзат и се трудат да бидат сфатени. Врз овие истражувања, „Гугл“ формира неколку клучни точки коишто се основа за еден продуктивен тим. Првиот е концептот на „психолошка сигурност“, модел на тимска работа во која членовите знаат дека е сигурно да преземаат ризици и да разменуваат идеи без страв дека ќе бидат понижени. За формирање на успешен тим, концептот на „психолошка сигурност“ го сметаат за најважен, додека останатите се поврзани со прашањата колку ви значи работата и колку верувате во тоа што го правите и останати параметри како сигурност (доверба) и структура и јасност.
