Важно да ги препознавате симптомите на алергии и настинки за да знаете како да ги третирате.
Во текот на зимските месеци на прв поглед може да биде тешко да се определи дали затнатиот нос е резултат на зимска настинка или на алергија. Но доколку точно знаете кои се симптомите со коишто се манифестираат алергиите и настинките полесно ќе можете да препознаете за што станува збор.
Всушност, како што потенцира алерголог Стивен Х. Коен, симптомите на настинка во текот на зимата се задржуваат од три до седум денови, а потоа се губат, додека симптомите на алергија траат многу подолго и може да се појавуваат наизменично. Исто така, одредени симптоми може да наговестуваат дека станува збор за настинка, а други за алергија. Оттука е важно да ги препознавате симптомите на алергии и настинки за да знаете како да ги третирате. Следниве симптоми се најчести за зимските алергии и настинки:
Зимска алергија
- Назалниот секрет е водлест;
- Се појавува чешање на очите и грлото;
- Симптомите траат со недели.
Зимска настинка
- Назалниот секрет е безбоен;
- Се чувствува болка и мачнина во мускулите низ целото тело;
- Симптомите поминуваат за околу една недела.
Дали сте изложени на ризик од зимски алергии?
Доколку сте склони на летни алергии, многу е веројатно да сте ранливи и на зимски алергии. Причината е едноставна – многу од иритантите коишто се појавуваат во текот на летото, се присутни и околу целата година. И во текот на студената зимска сезона кога вообичаено седите во својот дом со затворени прозорци и вклучени уредите за топлење, изложеноста на овие алергени се зголемува, вели Асриани Чиу, доцент по педијатрија и медицина (алергија/имунологија).
Предизвикувачи на зимски алергии
Повеќето зимски алергии се предизвикани од истите алергени коишто ги предизвикуваат и летните алергии, но за жал зимата може предизвика поинтензивна манифестација на истите. Во предизвикувачи на зимски алергии спаѓаат:
Домашни миленичиња
Бидејќи студеното време подразбира миленичињата да се почесто во затворен простор, вашата изложеност на нивното крзно се зголемува во зимските месеци, што може да доведе до влошување на симптомите на алергија.
Умерена клима
Во пределите каде што има поблагата клима, односно онаму каде што во зимските месеци има релативно мало замрзнување на надворешните површини, присуството на алергени, како што е поленот, е големо во текот на целата година.
Како да ги ублажите симптомите од алергиите?
Без разлика дали страдате од летни, пролетни или зимски алергии, постојат начини на кои може да управувате или да ги намалите симптоми на алергија, како:
Избегнувајте ги алергените
Првиот и најдобар третман за алергии е да се избегне она на што сте алергични. На пример, останете во затворен простор кога има силен ветер и не седете во близина на миленичиња доколку сте алергични на нивното крзно.
Одржувајте ја личната хигиена и хигиената во домот
Редовното измивање на рацете и лицето вообичаено го намалува бројот на алергени што ги носите и ширите околу себе. Кога симптомите на алергија се интензивни, истуширајте се бидејќи така ќе ги отстраните алергените од вашата коса. Притоа променете ја облеката што сте ја носеле бидејќи на неа се прилепуваат алергените. Исто така, редовно проветрувајте го домот и одржувајте ја хигиената за да ги минимизирате алергените во просторот.
Почесто перете ја постелнината
Креветот и постелнината се засолништа за крзното на домашните миленичиња и прашинските грини. За да ги отстраните овие алергени често проветрувајте ја спалната и менувајте ја вашата постелнина за спиење, како и перницата и прекривките.
