Прочитајте за најдобриот велосипедист Арсо, човекот кој постигна врвни резултати во велосипедизмот
Слободан Арсовски –Арсо e најдобриот велосипедист во Македонија во 20-тиот век. Тој со своите успеси и меѓународни настапи, одигра амбасадорска улога за промоција на Македонија и поранешна Југославија, постигнувајќи извонредни резултати. Арсовски е добитник на најпрестижната награда, наградата на град Скопје „13 ти Ноември“, (во 1973 година), за неговите достигнувања од областа на физичката и техничката култура. Тој девет години возел за репрезентацијата на поранешна Југославија како претставник од Македонија и во својата 11 годишна спортска кариера има поминато повеќе од 300,000 километри на велосипед.
На колку трки сте учествувале и која би ја истакнале? Кој го сметате за ваш најголем успех?
Трките на коишто сум учествувал не можат да се избројат. Стотици трки низ цела Европа и поранешна Југославија, почнувајќи од трката низ Југославија, Тур де Франс – Tur de Lavenir, Балканско првенство, Јадранска магистрала, Tрката на мирот Берлин – Прага – Варшава, Џиро ди Италиа и многу други. За најголем успех можам да ја издвојам трката низ Југославија која се вбројуваше во Светски куп, на која бев 11-ти во генералниот пласман.
Како започна вашата приказна со велосипедизмот?
Велосипед возам од најмала возраст, а со поддршката од мојот татко кој веруваше дека со овој спорт нема да губам време залудно, продолжив и активно да се занимавам со велосипедизмот. Па така, од мојата шеснаесетгодишна возраст почнувајќи во клубот ВК „Слога“ ја започнав мојата спортска кариера, а потоа и во ВК „Скопје“. До ден денес оваа пасија ми е и професија, бидејќи денес имам сопствена продавница за тркачки велосипеди „Цикло АС“ (позади Универзална сала во Скопје), во која можат да се вршат и сервисирања, да се најдат резервни делови. Тоа е сега мојата егзистенција по толку години талкања по патиштата и планините во Европа.
Колку овој спорт бара отстапки, тренинг и дисциплина? Воедно, дали знаете во моментов во Македонија колкава е заинтересираноста за занимавање со велосипедизам?
Како и секој спорт доколку сакате да имате резултати , мора да дадете сè од себе. Во Скопје моментално има голема заинтересираност за велосипедизам, но многу аматерска, бидејќи нема резултати, само глума и шминка. Моментално кај нас нема добри клубови и организација, и сè се сведува на импровизација.
Првиот победник на Тур де Франс, во 1903 година, Морис Гарин, пушел и пиел вино додека возел. Се разбира дека тоа денес не е така. Како треба да се хранат велосипедите, што јадевте за време на трките?
Порано немавме некоја посебна исхрана, јадевме и пиевме сè што сакаме. Во наше време храната беше поздрава. Јадевме сендвичи, чоколадо, секогаш во бидонот имав лимонада, не обична вода. Колку и да пиеш вода за време на трките во летниот период, толку повеќе ти се пие. Тоа е голема опасност за секој возач. Сепак, за врвни резултати е потребен посебен режим на исхрана кој денес е доведен до перфектност. Позади секој познат спортист стои лекар, тренер, нутриционист кој ја прати целата состојба на телото и му помага со различни додатоци во исхраната да освои подобри резултати.
Седумкратниот шампион на Тур де Франс, Ленс Армстронг, кој остана без титулите поради допинг, вели дека не се победува без стимулативни средства. Кој е вашиот став за ова?
Допингот бил присутен отсекогаш во секој спорт и ќе биде. Големите сили вложуваат многу пари за допинзи кои не можат да се откријат. Ленс Амстронг никогаш не бил позитивен на допингот, но бил поткажан. Сигурен сум дека се користи многу иако не го сакам воопшто, јасно е дека хемијата и витаминизираната храна придонесуваат за подобри резултати.
Кои се вашите совети за сегашните велосипедисти?
За вљубениците во велосипедот, да возат како што знаат и можат и колку што можат повеќе. За оние кои сакаат да се занимаваат професионално, да се потрудат да најдат соодветен клуб кој ќе им овозможи добра организација, тренинг, трки и сè она што е потребно за еден вистински професионалец.
