Карлос Гарсија, зависник од адреналин и шампион во слеклајн, доаѓа во Македонија
Карлос Мерајо Гарсија е трикратен шампион на Шпанија во одење на еластична лента, вештина која е светски позната како слеклајн – slackline. Слеклајн е балансирање на еластична лента која при отскокнување станува брановидна. Слеклајн е комбинација од фитнес и животен стил а денес веќе дел од урбаната култура. Овој спорт претставува голем предизвик за спортистите а во исто време е многу забавен за гледање. За прв пат кај нас, благодарение на „Спорт ин центарот“, ќе имаме можност да уживаме во неговиот настап кој ќе го отвори претстојниот настан за здрав животен стил HFW Expo, кој ќе се одржи од 23 до 25 септември во хотелот „Александар Палас“ во Скопје.
Слеклајн може да се опише со сосем спротивни поими, кои што во исто време се и подеднакво точни. Слеклајн е забавна активност но и натпревар, опуштена игра но и екстремен спорт. Каков е твојот однос кон слеклајн?
Слеклајн за мене претставува неверојатен, екстремен спорт кој ми дава чувство на исполнетост и достигнување.
Енди Луис, еден од најистакнатите слеклајнери го опишува терминот “slacklife” како инспирација, слеклајн сам за себе. Што претставува овој термин за тебе?
Тој е животен стил кој подразбира да уживаш во овој одличен спорт и да го правиш она што најмногу го сакаш.
Кој е твојот омилен стил на слеклајн? Кој стил нуди најмногу забава и кој ти претставува најголем предизвик?
Постојат неколку различни типови кои што се дел од овој спорт: rodeoline, waterline, longline и мојот омилен – hihgline trickline. Тој е комбинација од акробатска движења и луди вртења кои што се изведуваат на 1,50 метри над земја. Овој стил претставува најголема забава за мене.
Најдобри места за изведување? Паркови, планини или урбана средина?
Бидејќи живеам близу до плажа, таа претставува идеалното место за мене. Исто така, сакам да бидам над вода. Waterline е навистина забавна активност, бидејќи можеш да правиш сè што ќе ти текне, знаејќи дека не можеш да се повредиш бидејќи под тебе има вода.
Колку време е потребно за да се биде добар во овој спорт? Колку пати неделно вежбаш?
Мислам дека за да бидеш добар потребни се околу две години, но со упорност и истрајност сè е возможно. Јас вежбам 5 дена во неделата, 4 часа дневно.
Колку се менува начинот на живот доколку некој се одлучи да се занимава со слеклајнинг?
За мене најголема промена беше патувањето, јас патувам постојано низ целиот свет изведувајќи слеклајн. Постојано сум на некои настани или натпревари. Но го сакам ова. Не треба ништо да менуваш доколку сакаш да се занимаваш со слеклајн, бидејќи е забавна активност која што може да се изведува на отворено или на затворено со програмата SlackFit.
Слеклајн е неверојатно позитивен начин да се биде физички и ментално активен. Дали имаш некои особени навики, посебен начин на исхрана можеби?
Да, имам свој план кој е комбинација од тренирање и јадење, и се обидувам да бидам дисциплиниран и да се придржувам кон него, за да ми помогне со моите дневни активности и секојдневните тренинзи.
Што научи од оваа дициплина? Дали ги применуваш нејзините правила во секојдневниот живот, во смисла да се живее во моментот или стремење кон рамнотежа?
Сметам дека доколку нешто сакаш и го изведуваш со многу страст, со доволно труд и желба, сè е возможно, во слеклајн или во било што друго.
Слекјалн е поврзан со патување и одреден животен стил, во кој слободата и забавата се поважни од парите. Што ти е тебе важно, што те мотивира и која е твојата амбиција? Воедно кој е твојот следен предизвик?
Мојата амбиција е да напредувам секој ден и да бидам подобар со секој изминат тренинг. Треба да уживаш во овој спорт сè додека не паднеш, но потоа едноставно треба да станеш и да се обидеш повторно. Мојот нареден голем предизвик претставува живеењето во Дубаи. Набрзо се селам таму на две години каде што ќе настапувам на слеклајн шоу. Многу сум среќен за оваа можност и да, соништата се остваруваат!
