Хороскоп за 3та недела: Оваа недела Ракот ќе готви за сите, Лавот ќе ја нервира Девицата со тоа што ќе јаде мајонез наместо подготвените специјалитети пред него, Бикот и Овенот ќе останат гладни, а Вагата и Водолијата ќе започнат со диета, позната како лажна надеж.
.
Овен
Ќе сакате да го поделите сендвичот, бидејќи не сакате да јадете сами, но сепак, ќе се одлучите да ја поделите само салатата. Кога ќе купувате марула, ќе внимавате на сите да им кажете дека здраво се храните. На пат кон дома ќе размислувате дали да ја фрлите марулата веднаш или да почекате една недела.
Бик
Ако некој го загубил апетитот, тогаш сигурно му е кај вас. Вие сте мудри и знаете дека љубовта доаѓа преку стомакот, а вашата љубов кон храната, која е вистинска и без рок на траење, секако дека продолжува и по празничните трпези. Кон средината на неделата ќе почувствувате нервоза бидејќи кога ќе посакате нешто благо, ќе ви понудат овошје.
Близнаци
Оваа недела досадата ќе ја поистоветувате со глад. Ќе јадете непрекинато а бидејќи многу зборувате, ќе голтате повеќе воздух од залаци, па така ќе си останете со вашата идеална фигура. Неисцрпната љубопитност ќе ви помогне да измислите необични рецепти, но ќе доминира вашата нервозна природа, па повеќето од оброците нема да бидат успешни. Не може во сè да сте најдобри и покрај вашето високо мислење за себеси.
Рак
Периодов нема да излезете од дома и постојано ќе готвите. Кон оние кои што нема да уживаат во вашата храна, ќе развиете нетрпение бидејќи тоа ќе го сфатите како лична навреда. За вашето променливо расположение ќе ја обвините Месечината и како и секогаш, ќе се обидете да си ги изедете чувствата. Нема да успеете во намерата, па затоа зависноста од слатки ќе продолжи да ве измачува и оваа недела.
Лав
Вие сте крал на животните а не кокошка, па затоа не можете да јадете просо, хељда и слични хипи модерни видови на храна. Сите тие се само имитација на храна и тажна замена за квалитетен ручек. Вие знаете дека оваа храна е вистинска колку што се оригинални хипстерите, па затоа секогаш се трудите да сте што подалеку од оваа кобна комбинација.
Девица
Се нервирате кога ќе ве прашаат дали сте настинати бидејќи пиете чаеви и лимонада. Не, немате грип. Како и секогаш, главоболка ќе ви предизвикуваат Лавовите со нивниот балкански менталитет и Овните кои се убедени дека се отпорни на сè и одбиваат секаков совет во врска со нивниот животен стил кој што не го одобрувате.
Вага
Се рекло дека ништо не дава толку лажна надеж колку првите часа откако ќе започнете диета. Ви кажуваме да знаете, бидејќи веќе започнавте да припазувате на храна. Исто така, добро е да знаете дека диетата која што топи најмногу масти е онаа кога устата е затворена, а храна од која најмногу се слабее е онаа која што е физички далеку од вас, да речеме, во продавница.
Шкорпија
Вашата опсесивна природа во спој со променливото расположение, ќе ве натера да станете на сред ноќ и да јадете сè што ќе најдете. Не дека сакаме да ве утешиме, но размислете за ова: Ако не треба да се јаде навечер, тогаш зошто има светло во фрижидерот? Не грижете се, ве уверуваме дека не се бројат калориите доколку се јаде од стоење и тогаш кога никој не гледа.
Стрелец
Вам не ве интересира нутритивната вредност на ајварот, впрочем на ниедна храна, бидејќи за вас храната е само гориво, ништо повеќе. Единствено ви е потребна енергија, многу енергија и не ви е важно на кој начин ќе ја добиете. Нема да бидете благодарни на природно витото тело и силниот имунитет и ќе продолжите упорно да работите против себе.
Јарец
Да беше лесно да се јаде совесно и да се вежба редовно, сите ќе беа фит и здрави. Престанете надмено да им го зборувате ова на сите околу вас ако сакате да имате пријатели. Не се сите фитнес фанатици како вас. Колку и да ви се чини неверојатно, постојат луѓе кои што се сакаат себеси и си ги сакаат своите вишок килограми, како Рибите на пример.
Водолија
Вашиот хороскоп, односно ние, оваа недела ви советува да спортувате. Вие секако дека нема никого да послушате. Наместо тоа, ќе се обидете да држите диета, на која ќе се навикнете веќе од вториот ден. Зошто? Бидејќи вториот ден од диетата е секогаш полесен зашто веќе сте се откажале од неа.
Риби
Со текот на годините потешко се губат килограми, бидејќи тие веќе се спријателите со вашето тело. Вишокот килограми се удобно вдомени, тие се дел од вас а вие сте личност која што многу се приврзува. За вас најсилна љубов е онаа кон храната. Пицата никогаш нема ве изневери и никогаш нема да ви рече дека изгледате дебело во светлите пантолони. Еден добронамерен совет од нас: Знајте дека силната љубов најчесто е слепа.
