Македонија го одбележува Меѓународниот ден на лицата со аутизам
Аутизам е нарушување на невролошкиот развој, кое се одликува со намалена способност за социјализација и комуникација и со ограничено и повторливо однесување. Воедно, аутизмот претставува дел од човечкото искуство кое придонесува за човековата различност. Со покренување на свеста за аутизмот, да се изнајде специјален пристап, развивање на стратегија, имплементација, мониторинг и проценка на активностите и програмите во сите политички, економски и социјални сфери, со цел намалување на нееднаквоста. Мотото оваа година, е „Аутизам и агенда до 2030 година: Инклузија и невродиверзитет“.
Во Македонија, Меѓународниот ден на лицата со аутизам, ќе биде одбележан денес, 2 април, во организација на Здружението за третман на лицата со аутизам, АДХД и Апсергеров синдром – „Во Мојот Свет“ и мајките членови на здружението Весна Андреева, Аниса Трпевска, Валентина Попоска и Жижа Бејковска. Од денес започнува и кампањата „ЕДЕН СВЕТ ЗА СИТЕ“. Настанот ќе се одржи во Зоолошката градина, во Едукативниот центар, со почеток од 12 часот.
Во одбележувањето на овој ден, ќе учествуваат многу познати лица како: Ребека, Мики Јовановски – Џафер, Влатко Лозановски, Златни славејчиња, кореографско студио – Еурека и учениците од ОУ. „Петар Здравковски – Пенко“, кои што ќе се претстават со соло и групни изведби, песни и рецитали.
Гости на настанот ќе бидат претставници на дипломатскиот кор во Р. Македонија, браќата Тавитјан, кои што се автори на химната за аутизам – „Во мојот свет“, мото клубот „Ноќни Волци“ и претставници на општествено одговорни компании. Покровител на настанот е првата дама на Р. Македонија г-ѓа Маја Иванова.
И оваа година по повод 2-ри Април – Меѓународен ден на лицата со аутизам, Здружението „Во Мојот Свет“ ја внесува Р. Македонија во светската кампања „Light It Up Blue“ – „Да Осветлиме Во Сино“, како поддршка на лицата со аутизам. Оваа година, во сина боја ќе бидат осветлени претседателскиот кабинет, Археолошкиот музеј и Министерството за надворешни работи на Р. Македонија, со почеток во 19:00 часот.
Аутизмот може да го погоди секого, а се појавува четири пати повеќе кај машките отколку кај женските. Раното откривање на аутизмот е важно за стекнување на социјални вештини и самостојност. Засега, за аутизам нема лек. Кај оние со блага форма на аутизам, можен е самостоен живот. Со примена на бихејвиорална терапија, се зголемува прилагодливоста во однесувањето за подобро вклучување во општеството.
