Што кога вашето дете е дијагностицирано со срцева болест?
Кавасаки синдромот е болест којашто најчесто се развива кај децата на возраст под 5 години. Таа е една од водечките причини за срцеви заболувања кај децата. Добрата вест е што може да се третира ако се дијагностицира рано и што повеќето деца се опоравуваат без никаков проблем.
Причини за појава на Кавасаки синдром
Кога детето боледува од Кавасаки синдром, крвните садови низ неговото тело се воспалуваат. Ова воспаление може да ги оштети коронарните артерии и садовите што носат крв во срцето. Но, болеста не влијае само на срцето. Таа, исто така, може да предизвика проблеми со лимфните јазли, кожата и внатрешноста на устата, носот и грлото.
Научниците сè уште ја немаат пронајдено точната причина за развојот на синдромот Кавасаки. Сепка, повеќето сметаат дека состојбата е веројатно поврзана со изложеноста на вируси и бактерии, како и со комбинацијата на генетски и други фактори на животната средина, како што се разните хемикалии и надразнувачи.
Симптоми на Кавасаки синдром
Болеста Кавасаки се развива брзо и симптомите се појавуваат во фази. Со други зборови, проблемите со срцето може да се појават во периодот од 10 дена до 2 недели по појавата на некои од симптомите. Имено, симптомите кои се препознатливи за Кавасаки синдромот може да вклучат:
- висока температура, која обично трае повеќе од 5 дена;
- осип или лупење на кожата, често помеѓу градите и нозете и во областа на гениталиите или препоните, а подоцна и на прстите на нозете и рацете;
- оток и црвенило на дланките и стапалата;
- црвенило во очите;
- отекување на жлезди, особено на вратните;
- иритираност во внатрешноста на устата и грлото;
- надуен, светло-црвен јазик;
- болки во зглобовите;
- стомачни проблеми проследени со дијареа и повраќање.
Третман на Кавасаки синдромот
Детето коешто боледува од оваа болест може да чувствува голема болка од треска, отекување и иритација на кожата. Докторот може да препише лекови со цел да се намалат овие симптоми, вклучувајќи и други кои спречуваат згрутчување на крвта. Родителите не треба да му даваат на детето никакви лекови без прво да се консултираат со медицинско лице.
