9 Начини да се заштитите од аерозагадувањето

На кој начин можеме да се заштитиме и дали воопшто постојат начини на заштита на белите дробови и целокупното здравје со следниве девет совети

Најдобрата мерка на претпазливост против загаденоста на воздухот е да се обрнува постојано внимание на индексот за квалитет на воздухот во вашата област, што можете да го следите на оваа страница. Овој индекс ги алармира луѓето за скалата на сензитивност на загадувачите. Следствено, колку што е можно повеќе избегнувајте да бидете надвор во периодите кога индексот е алармантен. Обврските што ве принудуваат да транзитирате низ град, доколку условите ви овозможуваат завршувајте ги рано наутро или доцна навечер.

Секој има вродено право на живот, што значи на чист воздух!

Затоа постојано треба да ги потсетуваме нашите власти за тоа дека должни се да преземат сериозни мерки. Секој од нас треба активно да се вклучи во граѓанските акции за почист воздух во Македонија. Секој од нас може да придонесе кон почист воздух со тоа што ќе се намали употребата на моторни возила кога таа не е неопходна. Само погледнете колку многу автомобили постојано се движат низ нашите улици со само еден патник внатре, а тоа е возачот. Повеќе користете велосипед и одете пеш, но по улици кои се помалку загадени. Исто така, пожелно е да се префрлите на чиста енергија. Поддржете ги обновливите извори на енергија и модерните шеми за еко-енергија.

Што друго можеме да направиме?

1. За заштита од загаденоста на воздухот во затворените простории, редовното чистење на домот е неопходно. Отстранувајте ја прашината и влагата и не пушете цигари внатре. Освежувачите на простории препорачливо е да се избегнуваат, а хемиските средства за чистење што може да испаруваат хемикалии, треба да се користат по потреба.
2. Често следете ја временската прогноза и избегнувајте го магливото време што е можно повеќе.
3. Кога пешачите или возите велосипед избегнувајте ги улиците со многу сообраќаен метеж, особено во интервалите на шпицот.
4. Кога спортувате надвор, особено кога трчате или џогирате – алвеолите се најотворени. Токму затоа спортувајте во предели каде загаденоста е помала, не низ град, туку, еве да речеме, покрај Вардар на кеј.
5. Воздухот е почист на поголема надморска височина. Поради тоа, одете во природа, надвор од градовите колку што можете повеќе или едноставно одете во село. Планинарете почесто, а доколку не сте во можност, дури и одењето на Водно барем еднаш во неделата, ќе има позитивен ефект врз вашите бели дробови.
6. Пијте повеќе салеп. Покрај бројните здравствени придобивки од овој природен турски пијалак, уште од дамнешни времиња познато е дека се користи за олеснување на тегобите со дишењето, загушувањето во градите и спречува и лекува бронхитис.
7. Користете заштитна маска. Вреди да се инвестира во здравјето. Но, доколку финансиите ве спречуваат да си купите квалитетна специјална маска со филтри, која може да се набави во спортските продавници и аптеките, обичната хируршка маска која може да се најде и за само 4 денари од парче во аптеките, исто така ќе заврши работа. Па дури и носењето на марама на уста и нос ќе ве заштити колку-толку.
8. Купете си боца со кислород за секој случај. Ова не е шега, ниту предвидување на иднината. Во Кина веќе се продава воздух во лименка.
9. Приклучете се во групите за поддршка на борбата против загаденоста на воздухот кај нас.