Синдром „Доктор Стрејнџлав“

Синдромот кој го носи името на култниот филм на Кјубрик е еден од најинтригантните феномени во неврологијата

Синдромот „Доктор Стрејнџлав“ познат и како анархична рака, претставува медицинска состојба, кога едната рака, најчесто левата, се однесува како да е надвор од контрола. Името го добива од популарната култура, поточно од познатиот филм на Стенли Кјубрик, „Доктор Стрејнџлав“ заради сцената во која лудиот научник постојно се труди да ја контролира својата рака која прави нацистички поздрав.

Вака прикажан, овој синдром можеби припаѓа во некој хорор филм, но за жал, тој е реалност. Оваа состојба за прв пат се споменува во 1908 година, кога лекар објаснува случај на пациентка која после мозочен удар, верувала дека нејзината рака е независно мотивирана. Таа тврдела дека нејзината сопствена рака една вечер пробала да ја задави во текот на спиењето. После нејзината смрт, при проучувањето на нејзиниот мозок, се забележало оштетување во десната хемисфера. Психологијата објаснува дека овој синдром е последица на трауматична повреда на мозокот, лезија во фронталниот кортекс, карцином или мозочна инфекција.