ХЕРА го реализира овој настан во рамки на проектот „Советувалиште за превенција од употреба на дроги“
Денес, од 12:00 до 17:00 часот, во Културно информативниот центар – Скопје ќе се одржи јавниот промотивен настан „Изборот нека биде среќа“, како завршен настан на едногодишниот проект остварен во соработка помеѓу ХЕРА, Град Скопје и 10 средни училишта од Скопје. ХЕРА го реализира овој настан во рамки на проектот „Советувалиште за превенција од употреба на дроги“ финансиран од Град Скопје.
Овој проект вклучи десет средни училишта од град Скопје во активности кои што се насочени кон превенција од употреба на дроги кај младите.
Учениците, стручните служби и професорите во овие десет месеци организираа најразлични активности кои имаа за цел на позитивен и отворен начин да ги информираат младите, своите врсници и соученици, а со тоа и да создадат безбедна атмосфера каде што секој може да добие помош и поддршка. На настанот ќе бидат промовирани и изложени креативните творби кои учениците од овие училишта ги создадоа со цел на креативен начин да ги пренесат своите пораки за превенција од употреба на дроги, преку поезија и проза, танцови изведби, видео, театар, фотографија и ликовна изложба.
На настанот ќе се претстават учениците од училиштата кои и беа дел од проектот, од „Орце Николов“, „Георги Димитров“, „Никола Карев“, „Лазар Танев“, „Марија Кири Склодовска“, „Кочо Рацин“, „Здравко Цветковски“, „Боро Петрушевски“ и „Панче Караѓозов“.
