Интервју со: м-р фарм. Филип Ачкоски (Top Edukator) | www.topedukator.com
„50>100“ е продолжение на „50=100“ и практичен водич со 50 јасни здравствени совети, чек-листи и доказно-базирани препораки за најчестите здравствени состојби, исхрана, имунитет, хронични болести, женско и детско здравје. Авторот Филип Ачкоски е м-р по фармација со 20-годишно регионално искуство во фарма индустријата и основач на концептот Top Edukator.
PharmaNEWS.mk: Филип, излезе од печат „50>100“. Зошто токму сега продолжение на „50=100“?
Филип Ачкоски: : Тајмингот е избран бидејќи денес имаме судир на две реалности: од една страна преоптоварен здравствен систем а од друга страна ‘’поплава од совети“ во дигиталниот свет што често се контрадикторни или неточни. „50>100“ е практичен одговор на тоа — книга со јасни чекори што му помагаат на човек да реагира паметно, смирено и навреме.
Што значи вашата фраза: „книга што од пациент ве прави партнер во здравјето“?
Филип Ачкоски: Партнер значи човек што знае да разликува што е итно, што е само непријатно, а што е опасно. Партнер значи пациент што не троши време и ресурси на системот за секоја настинка — ама и пациент што не ги пропушта алармантните сигнали. Образован пациент е добивка за сите: за себе, за докторот, за аптеката и за здравствениот систем.
Кој е „идеалниот читател“ на „50>100“?
Филип Ачкоски: Книгата е за широка публика, но најмногу ќе ја почувствуваат три групи:
- Здравствени работници – како практично четиво и алатка за комуникација со пациенти.
- Љубители на здрав животен стил – кои сакаат докажани, применливи насоки.
- Менаџери и зафатени луѓе – кои немаат време за „гуглање“, туку бараат брзи, чисти чек-листи.
Кои теми ги покрива книгата? Дадете краток „тизер“.
Филип Ачкоски: Покриваме три големи фронта:
- Третман на најчести состојби: температура, дијареја, бронхитис, синузит, алергии, гастритис, надуеност…
- Нутритивни рамки што функционираат: хидратација, антиоксиданси, витамини/минерали, омега-3, пробиотици…
- Превенција и контрола: имунитет, хипертензија, дијабет, дислипидемија, женско и детско здравје.
Сè е напишано за да се чита брзо, да се памети лесно и да се применува веднаш.
Што е најголемата заблуда што ја гледате кај луѓето кога станува збор за здравјето?
Филип Ачкоски: Во суштина најчесто сме сведоци на две крајности: едните бараат „таблета за сè“ и го оптоваруваат здравствениот систем, а другите одложуваат и кога не треба. Едуцираниот пациент знае да направи разлика — што е итно, што е безопасно, и кога мора да побара стручна помош.
Во книгата често зборувате за „чек-листи“. Зошто?
Филип Ачкоски: Затоа што стресот го „краде“ рационалното размислување. Кога детето има температура во 2 по полноќ, никој не чита академски текст. Потребна се кратки прецизни насоки:
- што да направиш прво,
- што да следиш,
- кога да побараш помош.
Чек-листите го враќаат контролниот механизам кај човекот.
Каква е улогата на исхраната и суплементите во концептот „50>100“?
Филип Ачкоски: Асертивно кажано: исхраната е терапија со секојдневна доза. Суплементите не се замена за лоша исхрана, туку паметно надополнување кога има потреба. Затоа во книгата нема „мода“, туку рамки — што има смисла, кога, колку, и зошто.
Вашиот бренд Top Edukator е препознатлив. Што е мисијата?
Филип Ачкоски: Да изградиме здравствена култура. Не култура на страв, туку култура на разбирање. Кога луѓето знаат што прават, тие стануваат посмирени, поодговорни и поефикасни. И да — тогаш и системот дише полесно.
Едно провокативно прашање: дали „едуцираниот пациент“ некогаш станува „опасен пациент“?
Филип Ачкоски: Ако едукацијата е површна — да.
Ако некој чита два совета и мисли дека е доктор — тоа е ризик.
Но „едуциран пациент“ во мојата дефиниција е спротивното: човек што знае каде му се границите, знае кога да се консултира и знае дека превенцијата и дисциплината не можат да се надоместат со „гуглање“.
Каде може да се најде книгата и како читателите да стапат во контакт?
Филип Ачкоски Книгата е излезена од печат и е достапна за купување. За нарачки и дополнителни информации посетете ги следните линкови: https://stranica.mk/product/50-zdravstveni-soveti-za-prvite-100-godini-od-zhivotot-ii-del/ или https://stranica.mk/product/komplet-50-zdravstveni-soveti-za-prvite-100-godini-od-zhivotot-i-del-ii-del/ . За повеќе информации и активности: www.topedukator.com
