Пеницилинот припаѓа во групата на антибактериски антибиотици наречени бета-лактамски антибиотици
Алергијата на пеницилин претставува абнормална реакција на имунолошкиот систем на антибиотикот пеницилин што се препишува за третирање на различни бактериски инфекции. Пеницилинот припаѓа во групата на антибактериски антибиотици наречени бета-лактамски антибиотици. Алергијата на пеницилин може да биде привремена или трајна. Во случаите кога алергијата на пеницилин е трајна, може да се користат други антибактериски антибиотици како замена за овој антибиотик.
Причини за појава на алергија на пеницилин
Алергијата на пеницилин се појавува кога имунолошкиот систем не го прифаќа антибиотикот и реагира на него како на материја којашто би можела да му наштети на организмот. Алергијата на пеницилин се развива кога нашиот имунолошки систем станува осетлив на овој антибиотик. Со други зборови, откако по првото примање на антибиотикот нашиот имунолошки систем го препознае како страна материја, тој развива антитела коишто наредниот пат започнуваат да го напаѓаат антибиотикот. Оттука, материите што се ослободуваат во овој процес ги предизвикуваат знаците и симптомите на алергиска реакција.
Симптоми на алергија на пеницилин
Првите знаци на алергија на пеницилин може да се појават во период од еден час по примањето на антибиотикот. Поретко може да се случи алергиска реакцја да се појави по повеќе часови или денови по примањето на пеницилинот. Вообичаените симптоми за алергија на пеницилин се:
- исфрлање на кожата (црвенило, пликови, дамки);
- иритација на очите и грлото;
- јадеж и чешање на различни делови од телото;
- треска;
- отекување;
- отежнато дишење.
Многу ретко може да се појави анафилакса – посериозна алергиска реакција којашто се манифестира со:
- стеснување на грлото и дишните патишта што предизвикува отежнато дишење;
- вртоглавица и болки во абдоменот;
- повраќање и дијареа;
- намален крвен притисок;
- несвестица.
Превенција
Најдобрата превенција за заштита од посериозни компликации од алергијата на пеницилин е целосно избегнување на антибиотикот. Разговарајте со вашиот доктор за препишување на друг антибактериски антибиотик како замена за пеницилинот и не заборавајте да ја заведете алергијата во вашата здравствена легитимација за заштита во итни случаи.
