Хороскоп за 30-та недела: Иако „Покемон Гоу“ постои многу кратко време, веќе се појавија експерти кои тврдат дека играњето со покемони е добро за здравјето.
Овен
Со нетрпение чекате играта да пристигне во Македонија, а досега сте прочитале сè за неа и веќе им објаснувате на останатите. За вас оваа игра ќе биде чиста забава, авантура и можност за запознавање нови луѓе.
Бик
Играта ви се чини интересна, но не ве интересира нејзиниот здравствен или забавен аспект. Вие сте фасцинирани од нејзината брза популарност и барате начини како да ја претворите во бизнис можност. Вие ќе бидете оние играчи кои достигнале повисоко ниво и продаваат покемони на интернет.
Близнаци
Уште отсега не се одлепувате од телефонот и не ја криете вашата восхитеност од играта. Им досадувате на сите околу вас и размислувате да дадете отказ од работа за да можете целосно да се посветитите на фаќање покемони.
Рак
За играта ќе прочитате онолку информации потребни за социјална интеракција. Останатото време, секогаш кога ќе излегувате надвор, ќе проверувате дали на местото каде што планирате да одите има покемони, за да ги избегнете.
Лав
Сè додека не станете најдобри во играта, ќе глумите дека не ве интересира. Потоа, кога ќе станете успешни ловци на покемони, постојано ќе се фалите со ретките покемони што сте ги фатиле.
Девица
Ги прочитавте сите здравствени придобивки од оваа игра, но и сите инциденти. Фактот дека во Босна луѓе влегувале во минско поле за да бараат покемони, ќе ви го дефинира ставот за играта кој гласи: Од играчка – плачка.
Вага
Вие ќе ги ловите исклучиво ретките покемони. Останато време ќе се дружите со останатите играчи кои што ќе ви се видат интересни.
Шкорпија
Вие играта ја сфаќате како можност да си најдете партнер. Оние од вас кои што ќе станат страстни љубители на играта, ќе бидат бестрашни и ќе одат да бараат покемони дури и на најопасните места.
Стрелец
Мотото на „Покемон Гоу“ – „мораш да собереш сè“ ќе го сфатите многу сериозно и толку ќе се обземете од играта, што нема да забележувате кога ќе правите сообраќајни прекршоци и кога ќе влегувате во туѓи домови во потрага по редок покемон.
Јарец
Ваша единствена мотивација за играње ќе биде размената на покемони за пари. Вашата цел е да профитирате од лудилото.
Водолија
Вие веќе пишувате инструкции за играта на интернет и ја оправдувате дека е добра за здравјето бидејќи овозможува многу движење, а со запознавањето нови луѓе, помага при анксиозност.
Риби
Покемон што?
