Дознајте за неколку симптоми кои укажуваат на бременост уште во првите недели
Освен познатите симптоми на бременост како утринска мачнина и губење на менструален циклус, постојат голем број на индикатори кои укажуваат на бременост уште од најраната фаза, за кои можеби не сте свесни или пак сметате дека укажуваат на други состојби. Симптомите кај сите жени се различни и можат да варираат дури и од една бременост до друга. Во продолжение следат неколку необични симптоми кои укажуваат на рана бременост.
Чувствителни гради
Градите стануваат многу чувствителни на допир кој во одредени случаи, може да предизвикува болка. Овој симптом лесно може да се препише и на периодот пред менструација, па може да се случи да не се препознае вистинската причина за болката во градите. Исто така, сигурен знак за бременост е промена на бојата на ареолата на дојката, која почнува да се подготвува за доење.
Вагинален исцедок или инфекција
Постојано и упорно присуство на бел или жолт исцедок е многу честа појава за време на бременоста и претставува еден од првите знаци дека станува збор за бременост. Тој се појавува заради промената на хормоните и зголемениот проток на крв во вагината. Заради зачнувањето, се задебелуваат ѕидовите на вагината што резултира со слаб исцедок.
Настинка
Уште еден од раните необични знаци на бременост е чувството на постојана настинка и ринитис. Настинката е заради зголемување на хормоните и продукцијата на крв која ги отекува мукозните мембрани кои резултираат со зголемено лачење на секрет од носот. Истите хормони задолжени за опуштање и подговка на телото за породување ги опуштаат и синусите. Заради нив се јавува и силно ’рчење за време на спиењето. Овој симптом е доста чест а постои и посебен назив за оваа состојба, наречен труднички ринитис.
Вознемирен стомак
Проблеми при варењето на храната заедно со надуеност на стомакот, проследени со многу гасови, се меѓу првите симптоми на бременост. Проблематичниот стомак и гасовите се состојба која останува до крај на бременоста.
Нагли промени на расположението
Оваа промена повторно се должи на хормоните и ваквото однесување може да се задржи и после породувањето. На почетокот од бременоста, промените на расположението можат да се поистоветат со ПМС.
Голем замор
Заморот и чувство на поспаност се производ на хормоналните промени по зачнувањето. Телото формира многу нови клетки, активност која го објаснува зголемениот замор. Исто така, чувството на исцрпеност се јавува веднаш по првата недела од зачнувањето, бидејќи се зголемува нивото на прогестерон а се намалува крвниот притисок. Токму затоа и вртоглавицата е чест симптом кој укажува на бременост.
