Јаткасти плодови, микс од семиња, лененото семе, чиа семе – се дел од видовите на храна која ги намалува воспаленијата
Воспаленијата се дел од нашиот имунолошки систем. Тие се сигнал дека телото се бори со некаква инфекција и можат да бидат акутни и хронични. Акутното воспаление е предизвикано од оштетување на ткивото поради траума, штетни соединенија или микробиолошка инвазија. Тоа е всушност одбранбен механизам и дел од процесот на заздравување. Процесот на акутно воспаление е посредуван од страна на имуните клетки, а кога имунолошкиот систем не може да се справи со инфекцијата, воспалението станува хронично. Понатаму, хроничните воспаленија водат до појава на болести. Елиминирајте го воспалението во телото и заболувањето се подобрува.
Постојат многу причини коишто можат да предизвикаат воспаление. Зголемената телесна тежина, хроничниот стрес заради нерегулиран кортизол кој ги контролира воспалителните реакции во организмот, пушење, алкохол, прекумерна употреба на шеќер.
Според едно истражување од тим научници од Универзитетот Јужна Каролина, претераната консумација на шеќери и заситени масти е поврзана со поголем ризик од заболување од рак, со тоа што ваквиот вид на исхрана ги поттикнува воспалителните процеси.
Сево ова, докажува дека храната е клучна во борбата против воспаленија. Токму затоа, балансираната исхрана треба да биде составен дел од нашите животи. Впрочем, не е толку комплицирано да се внимава што се јаде, сè додека ги знаете хранливите својства на различните видови на храна. Со постапно додавање на храна со антивоспалителни својства во секојдневната исхрана, ќе направите значајно подобрување на квалитетот на вашето здравје.
Храна што ги намалува воспалителните процеси
Чиа семе
Чиа семето изобилува со омега масни киселини и содржи осум пати повеќе омега-3 од лососот. Тие штитат од развивање на срцеви заболувања а најдобар ефект имаат кога се земаат во комбинација 3-6-9, отколку кога се земаат поединечно. Чиа семето ги содржи сите три. омега-3 масните киселини го намалуваат високиот крвен притисок и го намалуваат воспалението. Уште една добра одлика на ова семе, е дека може да се консумира веднаш и нема потреба да се меле, бидејќи организмот без проблем го апсорбира.
Ленено семе
Воспаленијата се зголемуваат доколку се внесува мала количина на омега-3, особено во однос на омега-6 масните киселини. Лененото семе го изедначува односот помеѓу овие два типа на масти, бидејќи ги содржи и двете, заедно со омега-9 и уште бројни антиканцерогени состојки. Лененото семе го смирува воспалението на слузокожата на устата, желудникот и цревата. За проблеми со дигестијата, односно варењето на храната во стомакот, се препорачува да се консумира дневно со максимален внес од 2 лажици. Исто така, треба да се јаде сомелено за да треба да земете по две лажици дневно. Се препорачува да го употребувате сомелено, бидејќи на тој начин можете да ги искористите лековитите својства.
Сусам
Малите семиња, меѓу кои и сусамот, значително помагаат за превенција на многу болести, помагаат да ја внесете потребната дневна доза на протеини и есенцијални хранливи материи. Сусамот поседува растителни стероли, кои помагаат во регулирање на имунолошкиот систем, што е од особена важност за автоимуните заболувања како артритисот и лупусот. Сусамот со своите многубројни корисни својства придонесува за добро балансирање на имунитетот.
Производи со полно зрно
Храната со полно зрно, го намалува воспалението во организмот. Причина за ова е дека оваа храна поседува многу хранливи влакна, за кои се знае дека го намалуваат нивото на Ц реактивниот протеин (CRP) кој служи како маркер за воспаление. Тој е важен индикатор при воспаление, некрози на ткивото или при траума.
Јаткасти плодови
Јаткастите плодови (најмногу бадемите и оревите) се уште еден извор на антивоспалителни здрави масти. Бадемите изобилуваат со хранливи влакна, калциум и витамин Е, додека сите јаткасти плодови изобилуваат со антиоксиданти, коишто му помагаат на телото да ја закрепне од воспаленија.
Останати видови на храна коишто се борат со воспаленијата се: темнозелен листест зеленчук, ананас, ѓумбир, целер, брокула, боровинки, кокосово масло, пиперки, домати, цвекло, куркума, лук, маслиново масло, цреши. Во основа, непроцесираната и здрава храна, збогатена со семиња и јатки, се идеалниот начин на исхрана за спречување на воспалителните процеси во организмот.
