Ново истражување открива како жените полесно да се откажат од пушење
„Лесно е да се откажете од пушење. Јас сум го направил тоа илјада пати“, рекол Марк Твен. Секој којшто се обидел да ги откаже цигарите, го знае тешкиот пат на откажувањето. Едно ново истражување докажува дека во процесот на откажување кај жените, може значително да придонесе динамиката на менструалниот циклус.
Тутунската епидемија е една од најголемите јавно здравствени закани во историјата на човештвото, која убива по околу 6 милиони луѓе секоја година.
Во чадот од тутунот има повеќе од 4000 хемикалии, од кои за барем 250 е познато дека се штетни а за повеќе од 50 дека предизвикуваат рак. Пасивното пушење кај возрасните предизвикува сериозни кардиоваскуларни и респираторни заболувања вклучувајќи и коронарна срцева болест и рак на белите дробови; кај доенчињата може да предизвика ненадејна смрт, а кај бремените жени ниска родилна тежина на новороденчето.
Жените и пушењето
Новото истражување открива дека одредени недели од месечниот менструален циклус се поволни за жените кои што сакаат да се откажат од пушење. Тоа се должи на женските хормони естроген и прогестерон, кои што можат да го контролираат зависното однесување. За време на месечниот женски циклус, нивото на овие хормони се менува.
Така, за време на пред-овулаторната, односно фоликуларната фаза, кога естрогенот и прогестеронот се најниски, склоноста кон пороци е највисока, а кога овие хормони се високи, (за време на лутеална фаза) зависното однесување е намалено. Малата студија била составена од 38 здрави жени на возраст од 21 до 51 година, кои што биле поделени во две групи. Едната група која што се состоела од 22 учеснички кои што биле во фоликуларна фаза, додека останатите 16 ја сочинувале другата група и се наоѓале во лутеална фаза. На секоја волонтерка и било направена снимка на магнетна резонанца, со цел да се измери силата на врските помеѓу мозочните делови задолжени за контрола на однесувањето и оние задолжени за системот на наградување (амигдала и стриатум).
„Разбирајќи на кој начин фазите на менструалниот циклус влијаат врз невролошките процеси, спознавањето и однесувањето, е важен чекор во развивањето на поефективни третмани одбирајќи ги најдобрите решенија кои што би му помогнале на секој пушач“ истакнува една од главните истражувачи на студијата, Реган Витхирл.
Резултатите покажале дека за време на лутеалната фаза, поврзаноста помеѓу мозочните центри за когнитивна контрола и награда е зголемена. Тоа значи дека оваа фаза е поволна за откажување од зависностите, бидејќи колку е послаба врската, толку е потешко контролирањето на зависното однесување. Во оваа фаза се зголемува прогестеронот, а високите нивоа на прогестерон можат значително да им помогнат на жените кои што сакаат да се ослободат од зависноста.
