Исхемичните мозочни удари предизвикани од блокада на артериите сочинуваат околу 85 отсто од вкупниот број мозочни удари.
Една четвртина од луѓето во светот на возраст над 25 години може да доживеат мозочен удар за време на нивниот живот, се дознава во нова студија, објавена на 20 декември во дневникот „New England Journal of Medicine“.
„Стапките варираат од земја до земја, но во Соединетите Американски Држави од 23 до 29 отсто од луѓето може да добијат мозочен удар во животот“, заклучи тимот научници предводен од д-р Грегори Рот, професор по медицина на Универзитетот „Вашингтон“ во Вашингтон, Сиетл.
За студијата, Рот и неговите колеги користеле податоци од глобалното истражување „Глобален товар на болестите“ кое е едно од најголемите истражувања во кое се вклучени повеќе од 1800 врвни науцници од 127 земји. Овие податоци им помогнале да го проценат ризикот за мозочен удар кај лицата на возраст над 25 години.
Истражувачите ги разгледале двете главни форми на мозочни удари: исхемични мозочни удари предизвикани од блокада на артериите, кои сочинуваат околу 85 отсто од вкупниот број удари и хеморагични мозочни удари или удари предизвикани од крварење во мозокот, кои сочинуваат околу 15 отсто од вкупниот број на мозочни удари. Податоците коишто тие ги разгледувале вклучуваат 195 земји и ги опфаќаат периодите од 1990 до 2016 година.
Разгледувајќи ги податоците за 2016 година, тимот на Рот забележал дека ризикот од мозочен удар кај луѓето на возраст над 25 години се движи од 8 до 39 отсто, во зависност од тоа во кој дел од светот живеат. На пример, Кинезите имале најголем ризик за добивање на мозочен удар (повеќе од 39 отсто), по што следат луѓето коишто живеат во Централна и Источна Европа. Најмал ризик од мозочен удар имаат луѓето коишто живеат во Потсахарска Африка. Од друга страна пак, родот на лицата се покажал како ирелевантен, односно значајни разлики во ризикот за мозочен удар кај мажите и жените не се покажани.
Ризикот за едно лице да доживее мозочен удар се зголемуваат и со одредени фактори, вклучувајќи прекумерна тежина, пушење цигари и мала физичка активност. Оттука, научниците сугерираат дека новите сознанија би можеле да помогнат во поттикнување на младите да вежбаат почесто, да јадат поздрава храна, како и да ги избегнуваат пушењето цигари и прекумерното пиење алкохол.
„Лекарите треба да ги предупредат своите пациенти на многу порана возраст за активностите што можат да ги преземат за да го намалат ризикот од добивање на мозочен удар, како и други болести подоцна во животот“, рече Рот.
Д-р Ричард Либман е вицепретседател за неврологија во болницата „Long Island Jewish Medical Center“ во Њујорк. Тој вели дека мозочниот удар останува водечка причина за инвалидитет и смрт низ целиот свет. Во голема мера, спречувањето на мозочниот удар пред да се случи некогаш може да биде дури и посуштински во одредени географски области, иако ниту еден регион не е ослободен од оваа состојба.
