Енергетските пијалаци што се особено популарни кај младата популација, може да им наштетат на крвните садови и нивната функција.
Многубројни досегашни истражувања идентификуваа различни потенцијални здравствени ризици поврзани со консумацијата на енергетски пијалаци, како што се оштетување на црниот дроб, зголемен крвен притисок, забна ерозија и други.
Научниците предупредуваа дека овие пијалаци се поврзуваат со срцеви, нервни и стомачни проблеми и состојби. Но и покрај предупредувањата, енергетските пијалаци се сè уште помеѓу најчесто употребуваните додатоци во исхраната. Уште една неодамнешна студија дознава дека енергетските пијалаци што содржат кофеин, што се особено популарни кај младата популација, може да им наштетат на крвните садови и нивната функција.
Студијата вклучила 44 здрави студенти во своите 20-ти години коишто се непушачи. Истражувачите ја тестирале основната ендотелијална функција или функцијата на нивните крвни садови пред и 90 минути по консумацијата на енергетски пијалак. Имено, ендотелијалната функција е моќен показател за кардиоваскуларен ризик. Тие, исто така, ја следеле и дијалацијата на крвните садови со помош на ултразвук. Истражувачите забележале дека на почетокот дилатацијата на крвните садови била во просек 5,1% во дијаметар, додека 90 минути по консумацијата на енергетски пијалок дилатацијата на крвните садови се намалила на 2,8% во дијаметар.
„Многу млади деца консумираат енергетски пијалоци и кога вежбаат – период во кој функцијата на артериите треба да биде беспрекорна. Имено вежбањето и спортот бараат максимален проток на крв за кислородот да може брзо да стигне до клетките. Енергетските пијалаци го намалуваат дијаметарот на садовите и притоа го ограничуваат протокот на крв и движењето на кислородот. Последователно ова подразбира поголема работа на срцето, а помало снабдување со кислород, што би можело да објасни зошто досега биле забележани случаи во кои дела имале срцев удар по консумација на енергетски пијалок“, изјави д-р Џон Хигинс, професор по медицина на медицинската школа МекГонан во Центарот за здравствена наука на Универзитетот во Тексас, Хјустон.
Овој негативен ефект врз крвните садови може да биде поврзан со состојките во енергетскиот пијалок, како што се кофеин, таурин, шеќер и други состојки, сугерираат истражувачите. Тауринот е амино-киселина која се смета дека ја зголемува енергијата.
Сепак, според д-р Дејвид Кац, комбинацијата на шеќер и стимуланси во овие пијалаци нема докажана корист. Тој смета дека постојат многу подобри начини за зголемување на енергијата, како што е редовното вежбање.
Според истражувачите, лица под 18 години, жени кои се бремени или дојат, лица со чувствителност на кофеин, оние кои земаат стимуланси или лекови базирани на кофеин или оние со срцеви заболувања треба да се држат настрана од енергетските пијалоци.
Од друга страна, пак, производителите на енергетски пијалаци, изјавуваат дека енергетските пијалаци се безбедни за здравјето.
„Енергетските пијалаци содржат околу половина од кофеинот што е содржан во шолја кафе со истата големина и тие се детално истражени и одобрени за консумирање од страна на владините безбедносни органи ширум светот“, изјави Вилијам Дермоди, портпарол на Американското здружение за пијалаци.
