Споделете со пријателите!

Несоница (инсомниа) е нарушување кое се манифестира со потешкотии во заспивање или одржување на сонот, кои влијаат на целокупното здравје и го афектираат квалитетот на  секојдневниот живот.
„Несоницата претставува нарушување на спиењето кое секојдневно афектира милиони луѓе низ целиот свет. 30 до 35 проценти од возрасните се жалат на несоница.“
Несоницата е најчеста причина што води до дневна поспаност, летаргија и општо чувство на немоќ. Причините, симптомите и сериозноста на несоницата се индивидуални и можат да варираат. Меѓу најчестите причини за несоница се вбројуваат стресот и анксиозноста, одредени животни навики (работа во смени, консумирање алкохол, никотин и кофеин, обилни оброци), некои  психијатриски состојби (депресија, шизофренија) и физички состојби (проблеми со срцето, долготрајна болка, уринарни инфекции, хипертиреоидизам), како и употребата на одредени лекови (антидепресиви, антиепилептици, бета-блокатори, стероиди).

Несоницата го нарушува когнитивното и физичкото функционирање и е поврзана со широк спектар на афектирани дневни функции низ голем број емоционални, социјални и физички домени.

Несоницата може да предизвика проблеми како што се замор, недостаток на енергија, потешкотии за концентрирање и задржување на вниманието како и иритабилност. Ефектите од несоницата може да влијаат на речиси секој аспект од вашиот живот. Истражувањата покажуваат дека несоницата е поврзана со значителни нарушувања на квалитетот на животот. Студиите базирани на младата популација покажуваат висок степен на психијатриски коморбидитет кај пациенти со хронична несоница.

Всушност, несоницата почесто се поврзува со психијатриски нарушувања од било која друга медицинска болест.

Несоницата најчесто е поделена на два вида:

Акутна несоница – исто така наречена краткотрајна несоница. Симптомите перзистираат неколку недели.

Прочитајте:  Како јогата може да ви помогне со артритисот

Хронична несоница – овој тип трае со месеци, а понекогаш и со години. Според Националниот институт за здравство, повеќето случаи на хронична несоница се од секундарно ниво, односно тие произлегуваат од друг примарен проблем.

Најчести групи на луѓе погодени од ова нарушување се жени во менопауза, постари лица, адолесценти или млади возрасни ученици и секако луѓе кои често патуваат (особено преку повеќе временски зони)или работат во смени.

Несоницата може да влијае на луѓето од било која возраст – таа е почеста кај возрасни жени отколку возрасни мажи. Пореметувањето во спиењето  ги намалува училишните и работните перформанси и може да придонесе за зголемување на телесната тежина, зголемена анксиозност, депресија, раздразливост, проблеми со концентрирање како и проблеми со меморија, намален имунитет и намаленото време на реакција.

Промените во расположението, раздразливоста и анксиозноста се едни од најчестите симптоми.

Несоницата исто така е поврзана со поголем ризик од развој на хронични заболувања. Според Националната фондација за спиење, 30-40 % од возрасните во Америка велат дека имале симптоми на несоница во последните 12 месеци, а 10-15% од возрасните тврдат дека имаат хронична несоница.

Но не е сè така црно. Најчесто со многу малку напор, и посветеност во практикување на добрите навики за спиење и употребата на додатоци во исхрана ќе можете успешно да си помогнете во справувањето со несоницата. На кој начин ? Ќе дознаете наскоро во вториот дел од овој напис.


Споделете со пријателите!