Споделете со пријателите!
Покрај генетскиот код, во настанувањето на болеста влијаат и други фактори и навики, како: зголемено внесување на сол, прекумерено внесување кафе, алкохол, никотин, коморбидитетни фактори…
Артериска хипертензија е акутна или хронична болест кај која трајно е зголемен артерискиот крвен притисок. Најчесто оваа болест нема препознатливи и карактеристични симптоми. Под терминот крвен притисок се подразбира притисокот во артериите. Тој настанува како резултат на дејствување на две сили, едната ја создава левата комора, каде што крвта се истиснува во аортата, а другата сила ја создаваат самите артерии кои се спротивставуваат на отпорот на протокот на крв низ нив. Покачениот крвен притисок се карактеризира со систолен крвен притисок над 140mmHg и дијастолен над 90mmHg. Преваленцата на хипертензијата за крвниот притисок повисок од 140/90mmHg изнесува меѓу 15-30% од целата возрасна популација, а ако како граница се земе 160/95 mmHg, преваленцата изнесува 10-20%. Во некои развиени земји постои разлика меѓу урбаните и руралните средини , со повисока преваленца во градовите. Преваленцата се зголемува со возраста: 30% пациенти во шестата деценија од животот имаат СКП или ДКП над нормалните граници, а приближно 50 % на возраст над 65 години. Епидемиолошките студии покажуваат еднаква застапеност меѓу мажите и жените, со релативна предоминација на мажите под 50 години. За настанување на хипертензијата одговорна е мултифакториелната етиопатогенеза. Наследните особини имаат голема улога во настанувањето на болеста. Покрај генетскиот код, во настанувањето на болеста влијаат и други фактори и навики, како: зголемено внесување сол, прекумерено внесување кафе, алкохол, никотин, коморбидитетни фактори: дебелината, дијабетес мелитус, хиперлипидемија, физичката неактивност, како и хроничното покачено ниво на катехоламини- предизвикани од динамиката на современото живеење. Последиците од хипертензијата доаѓаат неочекувано и брзо и не ретко лицата добиваат срцев или мозочен удар. Лекувањето трае долго, некогаш и доживотно, но доколку навремено се почне со терапија, последиците можат да се минимизираат. Ефикасната превенција од хипертензија опфаќа: физичка активност, намалено внесување сол, намалување на телесната тежина, консумирање на повеќе мали оброци во текот на денот.
Д-р Миланчо Пејов, специјалист кардиолог
Споделете со пријателите!
