Одложувањето на стареењето со цел да се избегнат болестите поврзани со староста, а со тоа и смртта има за цел само продолжување на животниот век, а не тежнеење кон вечен живот
Докторите и научниците сакаат институциите кои ги регулираат лековите, како и агенциите кои ги финансираат истражувањата, да ги разгледаат лековите што ги одложуваат болестите поврзани со стареењето, како легитимни лекови. Ваквите лекови имаат физиолошка основа, велат истражувачите и можат да ги продолжат здравите години на пациентот забавувајќи ги процесите што се поврзани со општите болести на стареењето.
Досегашните третмани на болестите поврзани со стареењето, само заменувале една болест со друга, вели лекарот Нир Барзилаи – Nir Barzilai од Колеџот за медицина Алберт Ајнштајн во Њујорк. Тоа е така, бидејќи луѓето лекувани против една старечка болест често умираат од друга и тоа релативно брзо.
„Она што ние сакаме да го покажеме е дека доколку го одложиме стареењето, тоа е најдобриот начин за да ги одложиме болестите“ – додава Нир.
Доктор Нир и други истражувачи планираат да ги тестираат своите претпоставки во клиничко истражување наречено „Таргетирање на стареењето со Метформин“ – Targeting Aging with Metformin. Тие ќе им го дадат лекот метформин на илјадници луѓе кои веќе имаат една или две од следниве три здравствени состојби: рак, срцево заболување или когнитивно оштетување (или пак доколку постои ризик од појава на истите).
Лицата со дијабетес тип 2 не можат да бидат испитаници, бидејќи лекот метформин веќе се користи за лекување на таа болест.
Потоа, учесниците од студијата ќе бидат следени за да се види дали лекот ги надминува болестите што тие сè уште ги немаат, меѓу кои и дијабетесот. Исто така, треба да се испитаат сите можни несакани последици.
„Перцепцијата е дека сите ние го бараме изворот на младоста“ – истакнува Стефани Лидермен, извршен директор на Американската федерација за истражувања околу стареењето во Њујорк. „Ние сакаме тоа да го избегнеме. Она коешто ние се обидуваме да го сториме е да се зголеми животниот век, а не да бараме вечен живот“ – додава таа.
Организаторите на овој проект сметаат дека областа во која истражуваат сега е во многу подобра позиција, бидејќи студиите спроведувани врз животни, покажаа дека некои лекови и животни навики можат да го продолжат животот со помош на таргетирање на физиолошките патеки. Научниците мислат дека овој лек го продолжува животниот век зголемувајќи го бројот на кислородните молекули ослободени во клетките, што ги прави појаки и поиздржливи.
Доколку овој лек се покаже како успешен, како лек против стареење, тој ќе има потенцијал да им помогне на луѓето да живеат 120 години па и повеќе.
Мет Кеберлејн – Matt Kaeberlein од Универзитетот во Вашингтон, Сиетл, кој спроведува истражување за лекот Rapamycin кај старите кучиња, смета дека достигнувањето на Нир Барзилаи е за пофалба. Иако можеби и други лекови се поефективни во одложувањето на стареењето кај студиите со животни, Мет вели дека многуте години на искуство со Метформин кај луѓето, во комбинација со податоците дека овој лек влијае на процесот на стареење кај луѓето, го прават добар кандидат за прв клинички обид на ова поле.
