kako-da-se-spravite-vaginalnite-infekcii-vo-bremenosta_image
Споделете со пријателите!

Честа појава кај сексуално активната женска популација се вагиналните инфекции
Вагиналните инфекции се честа појава кај женската популација, пред се кај сексуално активните жени, така што нивниот третман и превентива бараат доста сериозен пристап. Но, уште поголемо значење им се придава ако се појават во текот на бременоста со оглед на тоа дека можат да предизвикаат несакани последици по плодот и здравјето на мајката.

Најчести вагинални инфекции се:

Инфективен вулвовагинитис – предизвикан од надворешни фактори или при пад на отпорноста на организмот (во бременоста нормално се намалува клеточниот имунитет), па вообичаената вагинална флора станува патогена. Симптоми се: перинеално чешање, пецкање, болки при полов однос, обилен секрет, непријатен мирис. Често може да бидат придружени и со уринарна инфекција. Најчести предизвикувачи се анаеробните бактерии, т.е кога ќе се намали бројот на лактобацилите доаѓа до прекумерен раст на овие бактерии, меѓу кои најчеста е Gardnerela vaginalis.

Трихомонијаза – Честа сексуално пренослива болест во бременоста е трихомонијаза. Присутен е жолто-зелен секрет со непријатен мирис. Пациентките се жалат на чешање во пределот на надворешните гениталии и болки при мокрењето.

Chlamydia trachomatis – во бременоста предизвикува воспалителна реакција на грлото на матката и вагината, но кај голем број жени инфекцијата може да биде и асимптоматска и да се открие како случаен наод од микробиолошки брисеви.

Останати сексуално преносливи инфекции кои може да се јават во текот на бременоста се оние предизвикани од микроорганизмите Mycoplasma hominis и Ureaplasma urealiticum. Често инфекциите со овие микроорганизми се доведуваат во врска со спонтани абортуси.

Кандидијаза – Најчест симптом е чешање, а често пациентките се жалат и на болно мокрење. Терапијата е со локален антимикотик во облик на вагиналети, како и орален и вагинален пробиотик. Локалните пробиотици се даваат за да се забрза обновувањето на нормалната вагинална микрофлора.

Поради посебната состојба на жената во периодот на бременоста, овие инфекции предизвикуваат посилни реакции, како што се предвремени породувања, абортус и неонатални инфекции кај бебето по раѓањето. Инфекциите го омекнуваат грлото на матката, а со тоа предизвикуваат предвремено отворање и породување.

„Инфекциите можат да го омекнат грлото на матката, а со тоа предизвикуваат предвремено отворање и породување.“

Најголем е ризикот од предвремено породување, кое овие инфекции може да го предизвикаат, па според тоа, најважна е превенцијата. Пред се, треба да се знае дека во тој период е особено битно одржувањето на т.н нормална микрофлора, составена од „добри“ микроорганизми, најчесто бактерии од родот Lactobacillus. Овие млечно киселински бактерии создаваат неповолна средина за развој на патогени (бактерии и габи) кои се предизвикувачи на вагинални инфекции. Бидејќи почесто се јавуваат кај сексуално активни жени, се препорачува користење заштита при полов однос, како и третман на партнерот, доколку се утврди инфекција кај жената. Најчесто користен пристап во терапијата во зависност од причинителот вклучува орална терапија со антибиотици од групата на макролидни антибиотици, метронидазол, антимикотици итн.

Прочитајте:  Вежбање во бременост со близнаци

Исто така, важно е жената редовно да посетува гинеколог и редовно да се прават прегледите. Микробиолошките скрининзи кои се спроведуваат во текот на бременоста во 12, 24 и 35 гестациска недела се, всушност превенција, а на тој начин е овозможено да се откријат и инфекциите кои се без симптоми, со што значително се намалува ризикот и компликациите кои може да се јават како последица од овие инфекции. Овие инфекции во првите 12 недели од бременост може да предизвикаат и оштетувања на органите на плодот. Бебето може да добие инфекција на очите, кожата, папочната врвца, како и воспаление на белите дробови и инфекции што се пренесуваат преку крвта. Брисеви задолжително треба да се земаат во раната бременост и во 36. недела, кога се гледа дали има бетахемолитичен стрептокок. Гинеколозите препорачуваат и жените кои планираат бременост задолжително да направат преглед пред да забременат.

Д-р Јасмина Димитровска – специјалист гинеколог – акушер

PharmaS_ProBalans Lady_700x90


Споделете со пријателите!